Bashkëkryetari i GUXO-s, Faton Peci, ka ushtruar të drejtën e votës në qytetin e Mitrovicës.

Ai është paraqitur në qendrën e votimit i shoqëruar nga bashkëshortja e tij, ku ka votuar në kuadër të procesit zgjedhor që po zhvillohet sot në të gjithë vendin.

Pas votimit, Peci u bëri thirrje qytetarëve që të dalin masivisht në zgjedhje dhe të ushtrojnë të drejtën e tyre demokratike, raporton KosovaPress.

“Sot është një ditë e madhe, dita kur flet populli, mund të them edhe dita kur flet Zoti. I ftoj të gjithë qytetarët e Mitrovicës dhe të Kosovës ta ushtrojnë të drejtën e tyre për të marrë pjesë sa më masivisht në këtë proces zgjedhor, për shkak se Kosovës i duhet stabilitet institucional. Institucione të nivelit qendror, president, qeveri funksionale që shërben për nevojat e përditshme të qytetarëve dhe synimet e ambiciet që i kemi si shoqëri. Po vërehet një fluks më i madh i njerëzve dhe uroj që këto të jenë zgjedhjet e fundit, Kosovës i duhen institucione stabile dhe funksionale”, u shpreh Peci.

Procesi i votimit në Mitrovicë po vazhdon normalisht, ndërsa qytetarët po i drejtohen qendrave të votimit që nga orët e hershme të mëngjesit.

Në gjithë Kosovën, qytetarët po votojnë për të zgjedhur përfaqësuesit e tyre në Kuvendin e Kosovës, ndërsa procesi po monitorohet nga institucionet përgjegjëse dhe organizatat vendore e ndërkombëtare.

/Kosovapress/