Ministri në detyrë i Shëndetësisë, Arben Vitia ka nënshkruar udhëzimin e ri administrativ për shkollimin specialistik, i cili përfshinë tri politika të reja në mbështetje të specializantëve të rinj.

Vitia ndër të tjerash përmes një video-mesazhi në Facebook njoftoi se specializantët nga të gjitha trevat shqiptare Lugina e Preshevës, Maqedonia e veriut, Mali i Zi do të kenë trajtim të barabartë si specializantët nga Kosova, raporton KosovaPress.

“Sot kam nënshkruar Udhëzimin Administrativ për shkollimin specialistik, me tri politika të reja në mbështetje të profesionistëve shëndetësorë.  Qytetarët nga të gjitha viset shqiptare, që deri tash kanë paguar 3000€ në vit për specializim, tash do të paguajnë vetëm 500€, njëjtë si qytetarët e Republikës së Kosovës. Për herë të parë, specializanteve që do të jenë në pushim të lehonisë do t’u vazhdohet pagesa pas kthimit në specializim. Po ashtu, përvoja 1 vjeçare e punës tashmë do të jetë vetëm kriter poentues”, deklaron Vitia.