Ekipi kosovar i xhudos ishte sot pjesëmarrës në Kampionatin Ballkanik të xhudos për grupmoshat U23, që po mbahet në Stamboll të Turqisë.

Kosova u paraqit me gjashtë xhudistë në Ballkanikun e xhudos, ndërsa pesë prej tyre arritën të fitojnë medalje, raporton KosovaPress.

Muhamedin Veseli (kategoria deri në 60 kilogramë) fitoi katër ndeshje me Ippon kundër katër garuesve si Alperen Ergun, Bunyamin Nasiroglu, Onur Tasçi dhe Firat Çekim. Në këtë kategori ishte shorti “round robin”, ku garuesit ndeshen secili me secilin, dhe në fund Veseli fitoi medaljen e artë.

Dëbora Gjakova (kategoria deri në 63 kilogramë) në xhiron e parë ishte e lirë, kurse në çerekfinale mposhti me Ippon turken, Ezgl Karademir. Në finale, Gjakova humbi me Ippon nga xhudistja tjetër e Turqisë, Habibe Ayfonlu dhe në fund i stolis me medaljen e argjendtë.

Loris Sharapolli (kategoria deri në 73 kilogramë) në raundin e parë ishte i lirë, kurse në çerekfinale e mposhti garuesin nga Maqedonia e Veriut, Andrej Simonoski. Më pas, Sharapolli u mposht në gjysmëfinale nga turku, Ejder Toktay, kurse në repesazh, në garën për të bronztën xhudisti ynë fitoi ndaj xhudistit nga Mali i Zi, Djordje Persic.

Sara Osmani (kategoria deri në 52 kilogramë) në xhiron e parë ishte e lirë, kurse në çerekfinale mposhti me Wazaari, garuesen nga Bosnja e Hercegovina, Joana Djuric. Në gjysmëfinale Osmani u mposht nga turkja, Nesibe Sena Coskun, dhe në garën për të bronztën, Osmani fitoi me Ippon kundër turkes tjetër, Yagmur Avci.

Rrezarta Alimi (kategoria deri në 70 kilogramë) në raundin e parë ishte e lirë, kurse në çerekfinale humbi me Wazaari nga turkja, Saniye Sen, me ç’rast garën e vazhdoi në repesazh, ku edhe e siguroi të bronztën duke e mposhtur me Wazaari në vazhdime turken, Yagmur Naz Aydin.

Ruvejda Llonqari (kategoria mbi 78 kilogramë) humbi ndeshjen e parë në çerekfinale kundër turkes Nahide Saylag, ndërsa pësoi humbje edhe nga xhudistja rumune, Ioana Cociorba, dhe kështu zuri vendin e shtatë në këtë garë.