Alarmi i kuq është lëshuar në 15 qytete në të gjithë Italinë, pasi vapa ekstreme vazhdon të prekë Evropën Jugore.

Alarmet, të cilat tregojnë rreziqe edhe për njerëzit e shëndetshëm, zbatohen për pikat e nxehta turistike, duke përfshirë Romën, Firencen dhe Bolonjën për ditët në vijim.

Më shumë temperatura të larta priten në Evropë javën e ardhshme, ndërsa një valë tjetër të nxehti po afrohet.

Nga Agjencia Evropiane e Hapësirës (ESA) kanë thënë se Italia, Spanja, Franca, Gjermania dhe Polonia mund të kenë kushte ekstreme.

ESA monitoron temperaturat e tokës dhe detit nëpërmjet satelitëve të saj.

Periudhat e nxehtësisë intensive ndodhin brenda modeleve natyrore të motit, por globalisht ato po bëhen më të shpeshta, më intensive dhe po zgjasin më gjatë për shkak të ngrohjes globale.

Qeveria italiane ka këshilluar këdo në zonat e mbuluara nga alarmi i kuq i së shtunës që të shmangë rrezet direkte të diellit nga ora 11:00 deri në orën 18:00 dhe të kujdeset veçanërisht për të moshuarit ose personat në rrezik.

Ndërkohë, Greqia ka arritur temperaturat 40°C (104°F) ose më shumë ditët e fundit. Akropoli - atraksioni më i njohur turistik i vendit - është mbyllur gjatë orëve më të nxehta të së premtes për të mbrojtur vizitorët.

Në vend ka frikë edhe për një rrezik më të madh të zjarreve, veçanërisht në zonat me erëra të forta, ku kanë pësuar zjarre të mëdha në vitin 2021 gjatë një tjetër vale të jashtëzakonshme të të nxehtit.

Temperaturat e larta kanë arritur gjithashtu në pjesët qendrore të Evropës, ku Gjermania dhe Polonina janë ndër vendet e prekura, shkruan BBC, përcjell KosovaPress

Vala aktuale e të nxehtit në Evropë është quajtur Cerberus nga Shoqëria Meteorologjike Italiane, sipas përbindëshit me tre koka që shfaqet në Ferrin e Dantes.

Valët e të nxehtit po shihen gjithashtu në disa pjesë të SHBA-së, Kinës, Afrikës së Veriut dhe Japonisë.

Zyra meteorologjike e Republikës Çeke ka lëshuar një paralajmërim se temperaturat gjatë fundjavës mund të shkojnë mbi 38 gradë Celsius, që është jashtëzakonisht e lartë për vendin.

Megjithatë, në Mbretërinë e Bashkuar të shtunën priten shira të dendura dhe erëra të forta në disa pjesë të Anglisë.

https://kosovapress.com/admin/%e2%80%8bvala-e-te-nxehtit-tete-qytete-italiane-ne-alarm-te-kuq/