Ka ndërruar jetë Bahrije Mustafa, gruaja e publicistit dhe këshilltarit politik të presidentit Ibrahim Rugova Xhemail Mustafës, i vrarë më 23 nëntor 2000 në hyrje të banesës së tij.

Lajmin për vdekjen e Bahrije Mustafës e bëri të ditur djali i saj Besian Mustafa, kandidat i LDK-së për deputet.

“Sot ndërroi jetë nana, ma i dashtuni shpirt n’këtë botë. Sa të kam frymë kam me të kujtu Nanë”, ka shkruar ai.

Varrimi bëhet nesër në 16:40 në varrezat në Arbëri, Prishtinë.

Pas publikimit të këtij lajmit, ka reaguar edhe kryetari i LDK-së dhe kandidati për kryeministër, Lumir Abdixhiku, i cili e ka vlerësuar të ndjerën Bahrije Mustafa si një grua me dinjitet, urtësi dhe përkushtim të rrallë.

Abdixhiku ka kujtuar se ajo mbajti me krenari kujtimin dhe veprën e bashkëshortit të saj, veprimtarit të njohur Xhemail Mustafa, duke e cilësuar si një figurë të rëndësishme të kujtesës kolektive.

“Zonja Bahrije ishte një grua e rrallë. Jeta i kishte ngarkuar mbi supe peshën e një humbjeje të madhe, por ajo kishte ditur ta shndërronte dhimbjen në dinjitet, forcë dhe përkushtim për familjen dhe vendin”, shkroi Abdixhiku.

Në emër të LDK-së, ai u ka shprehur ngushëllime familjes Mustafa, duke theksuar se shembulli i nënës së tyre do të mbetet frymëzim për të gjithë ata që e njohën.

/Kosovapress/