Shtetet e Bashkuara të Amerikës kanë planifikuar të dërgojnë një anije spitalore në Groenlandë, tha dje në mbrëmje presidenti i SHBA-së, Donald Trump, një veprim që mund të rrisë tensionet me aleatin e NATO-s, Danimarkën.

Trump shkroi në “Truth Social” se anija do të kujdesej për shumë njerëz të sëmurë atje.

“Është rrugës!!!”, tha ai, duke e quajtur atë një anije spitalore “të shkëlqyer”, por nuk dha detaje të mëtejshme.

Kërcënimet e përsëritura të Trump në javët e fundit për të aneksuar potencialisht Groenlandën, një territor danez me rëndësi strategjike, kanë tensionuar marrëdhëniet midis Evropës dhe Shteteve të Bashkuara të Amerikës.

Marina Amerikane operon dy anije të mëdha spitalore, secila me rreth 1 000 shtretër, duke përfshirë 80 njësi të kujdesit intensiv.

Këto anije janë vendosur më herët, pas fatkeqësive natyrore si tërmete ose uragane, dhe kanë shërbyer përkohësisht gjatë kulmit të pandemisë së Covid-19.

Groenlanda, me një popullsi prej rreth 57 000 banorësh, nuk ka raportuar kohët e fundit një nevojë të konsiderueshme mjekësore që do të kërkonte vendosjen e një anijeje spitalore.

Nuk është e qartë nëse misioni është koordinuar me qeverinë daneze apo autoritetet kryesisht autonome të Groenlandës, dhe afati kohor për vendosjen e anijes mbetet i pasigurt.

Anijet spitalore zakonisht operojnë me ekuipazhe minimale kur janë në spirancë, duke kërkuar kohë për të mobilizuar personelin e plotë.

Sistemi shëndetësor publik i Groenlandës përfshin klinika lokale dhe “Spitalin Queen Ingrid” në kryeqytetin Nuuk për raste komplekse, me evakuime mjekësore në Danimarkë.

Vendet evropiane, përfshirë Gjermaninë, Britaninë e Madhe dhe Francën, kanë mbështetur Danimarkën dhe Groenlandën, duke hedhur poshtë çdo plan aneksimi të SHBA-së, transmeton ATSH.

Bisedimet midis Kopenhagënit, Nuuk-ut dhe administratës Trump janë duke vazhduar për të arritur një kompromis.

/Kosovapress/