Presidenti i Shteteve të Bashkuara, Donald Trump, dëshiron që kreu i FIFA-s, Gianni Infantino, të jetë sekretari i ardhshëm i përgjithshëm i Organizatës së Kombeve të Bashkuara, ka raportuar “New York Post”, duke cituar burime pranë administratës amerikane.

Sipas këtyre burimeve, Trump beson se Infantino “respektohet nga të gjithë në botë” dhe se ka një aftësi të veçantë për “të bashkuar njerëzit”. Mandati i sekretarit aktual të përgjithshëm të OKB-së, Antonio Guterres, përfundon në fund të dhjetorit, ndërsa procesi për zgjedhjen e pasardhësit pritet të zhvillohet gjatë këtij viti.

Megjithatë, për të marrë këtë pozitë, Infantino do të duhej të siguronte mbështetjen e Këshillit të Sigurimit të OKB-së, i përbërë nga 15 anëtarë, dhe më pas miratimin e Asamblesë së Përgjithshme.

Nuk dihet ende nëse presidenti i FIFA-s e dëshiron një rol të tillë dhe nëse Trump ka diskutuar drejtpërdrejt me të këtë mundësi. Kandidatura e Infantinos është pjesë e një liste emrash që burime të “New York Post” i kanë cilësuar si kandidatura me pak gjasa.

Ndër emrat e tjerë të përmendur janë ish-presidentja e Kilit, Michelle Bachelet, si dhe drejtori i Agjencisë Ndërkombëtare të Energjisë Atomike, Rafael Grossi.

Një kalim i mundshëm i Infantinos në krye të OKB-së do të mund të ndryshonte edhe marrëdhëniet mes administratës Trump dhe organizatës ndërkombëtare, pasi presidenti amerikan ka qenë vazhdimisht kritik ndaj Kombeve të Bashkuara për mënyrën se si ka trajtuar konfliktet globale.

KosovaPress