Një ngjarje e rëndë ka ndodhur pasditen e së premtes në Ferizaj, ku një nxënës 15-vjeçar ka humbur jetën në rrethana ende të panjohura.

Lajmin për KosovaPress e ka konfirmuar zëdhënësi i Policisë për rajonin e Ferizajt, Kanun Veseli, i cili bëri të ditur se rreth orës 15:15 është pranuar informata se në shkollën e mesme “Kuvendi i Arbërit”, në rrugën “Brahim Ademi”, një nxënës mashkull është rrëzuar pa ndjenja në sallën e edukatës fizike.

“Me datë 17.04.2026, rreth orës 15:15, është pranuar një informatë se në shkollën e mesme “Kuvendi i Arbërit”, në rrugën “Brahim Ademi” në Ferizaj, një nxënës mashkull (15 vjeç), në rrethana ende të panjohura, është rrëzuar pa ndjenja në sallën e edukatës fizike”, tha ai për KosovaPress.

I mituri është dërguar me urgjencë në Qendrën Emergjente në Ferizaj, mirëpo sipas mjekut kujdestar, pavarësisht përpjekjeve për trajtim, ai ka ndërruar jetë.

“Lidhur me rastin janë njoftuar Njësia e Hetimeve e stacionit, hetuesit rajonalë dhe krimteknikët, të cilët kanë dalë në vendin e ngjarjes dhe kanë ndërmarrë veprimet e nevojshme hetimore”, ka deklaruar Veseli.

Ai bëri të ditur se për rastin është njoftuar edhe prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore (IML) për obduksion.

Policia ka bërë të ditur se hetimet janë në zhvillim dhe informata shtesë do të bëhen publike në raportet vijuese.

/Kosovapress/