Një punëtor i Korporatës Energjetike të Kosovës (KEK) ka ndërruar jetë në vendin e tij të punës. Lajmi fillimisht është konfirmuar nga KEK-ut.

Kurse, kryetari i sindikatës së KEK-ut, Xhelal Jashari, ka deklaruar se bazuar në informacionet fillestare nga organet e rendit dhe kolegët, i ndjeri ka pasur një incident gjatë orarit të punës, i cili ka rezultuar fatal.

“Sipas informacioneve të organeve të rendit dhe kolegëve që kanë qenë me të ndjerin, mund të konfirmojmë se i ndjeri ka pasur një incident në vendin e punës, ku edhe ka ndërruar jetë. Domethënë, pas arritjes së policisë dhe organeve të mjekësisë, ata e kanë vërtetuar se i ndjeri ka vdekur në vendin e punës”, tha ai.

Në një prononcim për mediat, Jashari tha se i ndjeri punonte si punëtor i sigurisë fizike pranë termocentralit "Kosova B".

Kryesindikalisti Jashari, në emër të sindikatës, u ka shprehur ngushëllime familjarëve dhe kolegëve të viktimës. "Jemi të shqetësuar, sinqerisht po ju them, sepse kemi humbur një koleg, kemi humbur një bashkëpunëtor tonin," ka shtuar ai, duke shprehur shpresën se incidente të tilla të mos ndodhin më.

Rrethanat e plota të ngjarjes ende mbeten të paqarta. Jashari ka theksuar se versionin e saktë të incidentit pritet ta japin organet e hetuesisë.

/Kosovapress/