Udhëzimet administrative, infrastruktura e dobët, TVSh e lartë, janë vetëm disa nga problemet që po ballafaqohen bizneset.

Kryetari i Hotelerisë dhe Turizmit të Kosovës (OHTK) – Departamenti i Estradës, Hysen Sogojeva më një konferencë për media, ka theksuar se Kosova është vendi i vetëm në rajon që paguan 18 për qind TVSH në akomodim, për çfarë ka thënë se është e padrejtë për bizneset.

Sogojeva ka përmendur edhe disa faktorë tjerë që po shkaktojnë telashe në këtë drejtim.

Ndërkaq, drejtori i estradës, Afrim Muqiqi ka informuar se estrada është një nga tatim-paguesit më të rregullt. Ndërsa, sa i përket kritikave, që estrada nuk paguan, ai ka thënë se vetëm vitin e kaluar estrada ka paguar mbi 2 milionë e gjysmë euro tatim.

Në anën tjetër, drejtori ekzekutiv i Odes, Sadik Gashi është shprehur se çështja e kuponëve fiskal mbetet problematikë për bizneset. Sipas tij, kjo duhet të rregullohet siç është më vendet e rajonit, të ketë një total dhe jo faturë për secilën porosi.

Ndërkaq, sa i përket çështjes se a po respektohen pajisjet për matjen e zhurmës nga lokalet e gastronomisë, Muqiqi ka theksuar se këtë duhet të rregullojnë kuvendet komunale, dhe se jo çdoherë kanë faj bizneset.