Një zhvillim dramatik ka përfshirë Lidhjen Demokratike të Kosovës (LDK), pas dorëzimit të 148 nënshkrimeve në selinë qendrore të kësaj force politike. Delegatët kanë kërkuar zyrtarisht mbajtjen e një kuvendi të jashtëzakonshëm me një synim të vetëm: shkarkimin nga detyra të kryetarit aktual, Lumir Abdixhikut.

Në një video-adresim të menjëhershëm, vetë Abdixhiku theksoi se ka autorizuar sekretarin e përgjithshëm të partisë për të filluar pa vonesë procedurat e verifikimit të nënshkrimeve. Pasi të përfundojë ky proces, do të caktohet data dhe vendi i mbajtjes së kuvendit. Ai siguroi se nuk do t'i shmanget asnjë procesi demokratik dhe as përballjes me votën e delegatëve, pavarësisht faktit se 207 delegatë të tjerë nuk i janë bashkuar kësaj iniciative.

Si pasojë e kësaj nisme për shkarkimin e tij, ai njoftoi ndërprerjen e të gjitha angazhimeve të LDK-së në bisedimet për formimin e institucioneve të reja të Republikës, duke argumentuar se nuk mund të negociojë në emër të partisë kur mandati i tij vihet në dyshim nga brenda.

“Në këtë pikë, më duhet po ashtu, t'i njoftoj qytetarët e vendit tim se për shkak të kësaj nisme, detyrohem t'i ndërpres të gjitha angazhimet për formimin e institucioneve të Republikës, që i prisnin me të drejtë tash e sa kohë. Në këto rrethana, për shkak të kësaj nisme, nuk do të ishte as serioze dhe as e përgjegjshme që unë të vazhdoja të negocioja në emër të LDK-së, ndërkohë që mandati im për të udhëhequr dhe përfaqësuar atë është vënë në diskutim nga brenda shtëpisë sime”, tha ai.

Duke refuzuar të mbajë përgjegjësi për dëmet që ky proces mund t'i shkaktojë LDK-së, Abdixhiku u bëri thirrje mbështetësve dhe aktivistëve që :të mos dorëzohen para zhgënjimit”. Ai i ftoi ata të qëndrojnë të fortë dhe të mbrojnë vlerat demokratike të shtëpisë së tyre politike, përballë atyre që, sipas tij, po synojnë përçarjen e partisë për interesa të ngushta personale.

/Kosovapress/