Tërbohet Xhaka: Turp ajo që ndodhi në fushë
Pas humbjes 2-0 ndaj Danimarkës, zhgënjimi në mesin e kombëtares zvicerane është i madh. U fol për vendimet e arbitrit Daniel Siebert. Ai jo vetëm që i dha kartonin e kuq Nico Elvedit pas një faulli në minutën e 50-të, por përjashtoi me karton të verdhë-kuq kapitenin Granit Xhaka.
Por zemërimi i zviceranit nuk ishte drejtuar vetëm te arbitri. Zviceranët ngritën akuza edhe ndaj danezëve. Sidomos, situata para rezultatit 0-1 nxehi emocionet zvicerane.
"Breel është shtrirë në tokë dhe është goditur disa herë," shpjegoi trajneri Murat Yakin. Sidoqoftë, kundërshtari thjesht e vazhdoi lojën. "Kjo nuk ishte absolutisht një lojë e ndershme nga danezët," shtoi ai, përcjellë KosovaPress.
Granit Xhaka gjeti fjalë edhe më drastike se Yakin. “Kartoni i kuq është një skandal i madh për mua. Nuk ka nevojë për ta diskutuar atë”, shpërtheu kapiteni. “Mendoj se jam qetësuar përfundimisht në vitet e fundit. Por kur diçka është e padrejtë, emocionohem shumë”, ka vazhduar Xhaka.
“Në futboll fjala respekt është shumë e rëndësishme. Ajo që treguan danezët sot nuk ka të bëjë fare me respektin”, thotë mesfushori i Leverkusenit. “Është turp që duhet të diskutojmë për respektin në vitin 2024”, shton Xhaka i tërbuar.
