Projektuar nga BIG në bashkëpunim me ALB-Architect, Teatri i Operës dhe Baletit të Kosovës, do të përfshijë katër salla performancash dhe një shesh të ri publik në kryeqytetin Prishtinë. Si opera e parë në Republikën e Kosovës, teatri simbolizon trashëgiminë e pasur dhe të larmishme kulturore të vendit, duke reflektuar një identitet të ri për Prishtinën, të rrënjosur në krijimtari dhe përkushtim ndaj zhvillimit artistik.
I udhëzuar nga Ministria e Kulturës, Rinisë dhe Sportit (MKRS), teatri do të bëhet shtëpia e Filarmonisë së Kosovës, Baletit dhe Operës. Ndërtesa do të përfshijë një sallë koncertesh me kapacitet për 1,200 vende, një sallë teatri me 1,000 vende, një sallë recitali me 300 vende, një dhomë teatri, si dhe një qendër edukimi dhe konferencash. E vendosur pranë Pallatit të Rinisë dhe Sporteve, Stadiumit "Fadil Vokrri" dhe Ministrisë së Shërbimeve Publike, kjo qendër do të kontribuojë në krijimin e një korridori të ri kulturor dinamik në zemër të qytetit.
Vendndodhja qendrore e teatrit siguron qasje të lehtë për këmbësorët, si në nivelin e rrugës ashtu edhe përmes podiumit të Pallatit të Rinisë dhe Sporteve. Ky podium ekzistues do të zgjerohet për t’u bashkuar natyrshëm me shkallët e mëdha të jashtme të teatrit, duke përmirësuar lidhjen për këmbësorët dhe duke e kthyer hapësirën në një shesh publik të gjallë.
“Dizajni i Teatrit të Operës dhe Baletit të Kosovës lejon fleksibilitet për të përmbushur nevojat e sakta të organizatave që do të përdorin hapësirat, ndërkohë që ofron një ambient modern që do të sjellë gëzim dhe kënaqësi për brezat e ardhshëm të vizitorëve dhe artistëve. Dizajni i teatrit simbolizon një epokë të re të artit dhe kulturës në Kosovë – me potencialin për të prekur zemrat e të gjithë atyre që e përjetojnë”, pohoi Andy Young, Partner në BIG London, BIG-Bjarke Ingels Group.Një gjuhë e qëndrueshme dizajni unifikon brendësinë e sallave të performancës, me elemente druri të lakuar që krijojnë hapësira skulpturore, por funksionale. Salla kryesore e koncerteve ka zona të vogla me ulwse që ndërlidhen në mënyrë të natyrshme për të siguruar pamje optimale të skenës, ndërsa Salla e Teatrit me tre kate ofron një ambient madhështor por intim, i mbështetur nga një sistem ndriçimi i plotë dhe ura teknike të fshehura. Dhomat e tjera të teatrit dhe Salla e Recitalit ofrojnë më shumë fleksibilitet për shprehje artistike të ndryshme.
Në të gjitha hapësirat e performancës, estetika mbizotëruese prej druri mat kombinohet me shkëlqimin e tapicerive prej kadifeje të thellë dhe perdeve akustike të veçanta për secilin ambient. Ndërtesa është e rrethuar nga një peizazh me gurë natyrorë dhe një seri "ishujsh" të gjelbër me shtigje të dredhura. Këta ishuj do të mbillen me një shumëllojshmëri bimësh, përfshirë pemë ahu, të cilat do të promovojnë biodiversitetin, do të ofrojnë ndryshime sezonale dhe strehë natyrore.
