Qeveria e Britanisë së Madhe dhe Premier Liga kanë dhënë miratimin e tyre për blerjen e Chelseat nga Todd Boehly, e cila vlerësohet të jetë rreth 5 miliardë euro.

Konsorciumi i Todd Boehly kishte kaluar tashmë të gjitha kontrollet e nevojshme nga Premier Liga, përcjell KosovaPress.

Përditësimi i fundit është se Qeveria e Britanisë së Madhe tani ka lëshuar një licencë shitje, pasi që dëshironte të sigurohej që asnjë nga të ardhurat të mos shkonte për Roman Abramovich, për shkak të lidhjeve të tij me Vladimir Putin.

“Mbrëmë vonë, Qeveria e Britanisë së Madhe arriti një pozicion ku ne mund të lëshonim një licencë që lejon shitjen e Klubit të Futbollit Chelsea. Pas sanksionimit të Roman Abramovich, qeveria ka punuar shumë për të siguruar që Klubi i Futbollit Chelsea të jetë në gjendje të vazhdojë të luajë futboll”, tha një person brenda qeverisë.

“Por ne kemi qenë gjithmonë të qartë se e ardhmja afatgjatë e klubit mund të sigurohet vetëm me një pronar të ri. Pas punës së gjerë, tani jemi të kënaqur që të ardhurat e plota të shitjes nuk do të përfitojnë Roman Abramovich ose ndonjë individ tjetër i sanksionuar”, shtoi më tej ai.

Epoka e Abramowich te Chelsea edhe zyrtarisht ka marrë fund, ku Todd Boehly së bashku me konsorciumin e tij do të jenë nën udhëheqje të klubit londinez.