Gjykata Supreme e Kosovës ka reaguar ndaj raportimeve që lidhen me vendimin e fundit të Gjykatës Kushtetuese për tregun e lirë të energjisë elektrike, duke sqaruar se aktgjykimi i saj që kishte aprovuar padinë e Odës Ekonomike të Kosovës (OEK) kundër Zyrës së Rregullatorit për Energji (ZRRE) nuk është rrëzuar dhe nuk është kthyer në rishqyrtim.

Sipas Gjykatës Supreme, vendimi i Gjykatës Kushtetuese nuk i referohet aktgjykimit P.A.nr.18/2025, me të cilin ishin shpallur të paligjshme dhe ishin shfuqizuar disa dispozita të udhëzuesve për liberalizimin e tregut të energjisë elektrike.

Gjykata ka bërë të ditur se vendimi i Kushtetueses lidhet me një rast tjetër, konkretisht me aktvendimin P.A.nr.24/2025, përmes të cilit ishte hedhur poshtë si e palejueshme padia e një operatori ekonomik, me arsyetimin se akti i kontestuar nuk përmbante elementet e një akti nënligjor normativ dhe për këtë arsye nuk mund të shqyrtohej në procedurë administrative.

Në këtë rast, Gjykata Kushtetuese konstatoi shkelje të së drejtës për gjykim të drejtë dhe qasje efektive në drejtësi, duke vlerësuar se Gjykata Supreme ishte fokusuar kryesisht në formën juridike të dokumentit dhe jo në efektet konkrete juridike dhe ekonomike që ai prodhonte për palën paditëse.

Për pasojë, Kushtetuesja shpalli të pavlefshëm aktvendimin P.A.nr.24/2025 dhe e ktheu çështjen për rishqyrtim.

Ndërkohë, Gjykata Supreme theksoi se aktgjykimi P.A.nr.18/2025, i cili kishte të bënte me kërkesëpadinë e Odës Ekonomike të Kosovës kundër ZRRE-së, mbetet në fuqi dhe nuk është objekt i vendimit të Gjykatës Kushtetuese.

Me atë aktgjykim, Gjykata Supreme kishte aprovuar kërkesëpadinë e OEK-së dhe kishte shpallur të paligjshëm nenin 8 të Udhëzuesit për Liberalizimin e Tregut të Energjisë Elektrike të vitit 2017, si dhe nenin 2 të udhëzuesit që ndryshonte dhe plotësonte këtë akt.

Në arsyetimin e saj, Gjykata Supreme kishte vlerësuar se mospërputhjet ndërmjet ligjit dhe akteve nënligjore kishin krijuar pasiguri juridike dhe ekonomike për konsumatorët dhe operatorët në tregun e energjisë elektrike, duke e bërë të nevojshme ndërhyrjen gjyqësore për mbrojtjen e sigurisë juridike dhe trajtimit të barabartë.

Përmes këtij sqarimi, Gjykata Supreme ka kërkuar informim të saktë të opinionit publik, duke theksuar se vendimi i Gjykatës Kushtetuese nuk prek aktgjykimin që lidhet me padinë e Odës Ekonomike të Kosovës për liberalizimin e tregut të energjisë elektrike.

/Kosovapress/