Irani ka nisur një valë të re sulmesh të enjten në mëngjes ndaj bazave izraelite dhe amerikane, duke paralajmëruar se Shtetet e Bashkuara do të “pendohen keq” për shkatërrimin e një anije iraniane në Oqeanin Indian, shkruan AP, transmeton KosovaPress.

Në anën tjetër, Izraeli kreu dy sulme afër kryeqytetit të Libanit, ku tre persona u vranë dhe gjashtë të tjerë u plagosën, raportohet nga mediat libaneze.

Ndërkohë, një udhëheqës fetar, Abdollah Javadi Amoli , kërkoi “gjakun e Trumpit”, ndërsa Izraeli njoftoi nisjen e një sulmi “të gjerë” ndaj Teheranit.

Sulmet e Iranit vijnë pasi marina amerikane shkatërroi anijen luftarake iraniane IRIS Dena, ku humbën jetën të paktën 87 marinarë iranianë. Sipas Asssociated Press, shpërthimet u dëgjuan në disa zona të Teheranit, ndërsa autoritetet izraelite goditën edhe pozicione të Hezbollahut në Liban, përcjellë KosovaPress.

Lufta deri tani ka shkaktuar mbi 1,000 viktima në Iran, mbi 70 në Liban dhe rreth një duzinë në Izrael, duke rrezikuar furnizimin global me naftë dhe gaz dhe duke penguar qarkullimin ndërkombëtar.