Sulm me dron në Sudan, mes të vrarëve edhe disa nxënëse
Dëgjoje me zë...
Sulm me dron në Sudan, mes të vrarëve edhe disa nxënëse
Të paktën 17 persona, kryesisht nxënëse, janë vrarë pasi një dron i mbushur me eksploziv goditi një shkollë të mesme dhe një qendër shëndetësore në jug të Sudanit.
Sulmi ndodhi të mërkurën në fshatin Shukeiri në provincën e Nilit të Bardhë, raporton AP, transmeton KosovaPress. Sipas drejtorit të Spitalit Douiem, Musa al-Majeri, nga sulmi u plagosën edhe të paktën 10 persona. Ai tha se tre vajza pësuan lëndime të rënda; dy prej tyre iu nënshtruan operacioneve në spital, ndërsa një tjetër u dërgua në kryeqytetin Khartoum për trajtim.
Rrjeti i Mjekëve të Sudanit raportoi se në mesin e viktimave janë edhe dy mësues dhe një punonjës shëndetësor, duke theksuar se në fshat nuk kishte prani ushtarake.
Grupi mjekësor dhe drejtori i spitalit fajësuan për sulmin forcat paraushtarake të Mbështetjes së Shpejtë (RSF), të cilat nuk kanë reaguar ndaj akuzave. Sipas tyre, ky është një vazhdim i sulmeve të RSF-së ndaj objekteve civile në rajonin e Nilit të Bardhë, përfshirë edhe një konvikt studentësh dhe një stacion energjetik në ditët e fundit.
