Luis Suarez do të luajë ndeshjen e tij të fundit për Uruguain pasi njoftoi tërheqjen e tij nga futbolli ndërkombëtar gjatë një konference për shtyp duke qenë i përlotur. Suarez tha se do të largohet nga kombëtarja pas ndeshjes kualifikuese të Kupës së Botës të së premtes kundër Paraguait dhe do t'i qaset ndeshjes me të njëjtin këmbëngulje si në ndeshjen e tij të parë në vitin 2007.
“Do të iki me qetësinë se kam dhënë gjithçka për kombëtaren deri të premten. Nuk jam penduar”, tha Suarez. “Nuk ka krenari më të mirë për veten sesa të dish se kur është momenti i duhur për t'u tërhequr dhe për fat kam besim se po tërhiqem nga kombëtarja sepse dua të bëj një hap të ri”, shtoi ai.
Suarez, i cili luajti për Liverpoolin nga viti 2011 deri në 2014, tha se ndihet krenar që mund të tërhiqet sipas kushteve të tij, përcjellë KosovaPress.
“Unë jam 37 vjeç dhe e di që është shumë e vështirë të shkosh në Botërorin e ardhshëm. Më ngushëllon shumë fakti që mund të tërhiqem dhe jo që dëmtimet e mia të më detyrojnë të tërhiqem, apo të mos më thërrasin”, tha ai.
Suarez luajti në katër Kupa Botërore, duke fituar Kupën e Amerikës në vitin 2011 dhe u shpall lojtari më i mirë i turneut.
