Futbollisti i Spanjës, Lamine Yamal, i ka quajtur “të papranueshme dhe mungesë respekti” thirrjet raciste që u dëgjuan gjatë barazimit 0-0 mes Spanjës dhe Egjiptit, që u luajt të martën në Barcelonë.

Policia në Spanjë ka nisur hetime për thirrje “islamofobike dhe ksenofobike” që u dëgjuan gjatë pjesës së parë të ndeshjes në stadiumin RCDE, kua luan ekipi i La Liga-s, Espanyol, njofton BBC, përcjellë KosovaPress.

Menjëherë pas kësaj, në ekranin e stadiumit u shfaq një mesazh që paralajmëronte tifozët të mos përdorin gjuhë diskriminuese, ndërsa mesazhi u përsërit edhe në pjesën e dytë, duke shkaktuar reagime nga disa tifozë.

Në një reagim në rrjetet sociale, Yamal, i cili është mysliman, tha se është prekur nga thirrjet: “kërce, kërce, kush nuk kërcen është mysliman”.

“Unë jam mysliman, falë Zotit. E di që thirrjet ishin kundër ekipit kundërshtar dhe jo personale ndaj meje, por si mysliman kjo mbetet mungesë respekti dhe diçka e papranueshme,” tha ai, transmeton AA, përcjellë KosovaPress.

Sulmuesi i Barcelonës shtoi se përdorimi i fesë për të tallur në stadium është sjellje injorante dhe raciste.

“Futbolli është për argëtim dhe mbështetje, jo për të fyer njerëzit për atë që janë apo për atë që besojnë,” theksoi Yamal.

Federata Spanjolle e Futbollit dënoi gjithashtu këto thirrje, duke theksuar se është kundër racizmit dhe çdo forme dhune në stadiume.

Edhe trajneri i kombëtares së këtij shteti, Luis de la Fuente, i quajti këto veprime “të papranueshme” dhe tha se persona të tillë duhet të identifikohen dhe të largohen nga sporti dhe shoqëria.

Ndeshja ishte planifikuar të zhvillohej në Katar, por u zhvendos në Barcelonë për shkak të luftës në Lindjen e Mesme.