Sot mbahen zgjedhjet e përgjithshme të parakohshme britanike.
Mundësia më e madhe është që Laburistët e opozitës së qendrës së majtë të fitojnë një mandat që do jetë i jashtëzakonshëm, por edhe i brishtë njëkohësisht, një lloj kështjellë rërë elektorale.
Të gjitha këto, nën disa prej qeverive më të çuditshme, më të paafta dhe ndoshta më qesharake, që ulen në nivele të padëshmuara reputacionin ndërkombëtar të një prej demokracive më të suksesshme perëndimore. Zgjedhjet pritet të jenë përzgjedhja më e rëndësishme e britanikëve pas referendumit të Brexit, në 2016-ën, apo edhe një korrigjim deri diku i tij. Laburistët e drejtuar nga një ish avokat i të drejtave të njeriut i kthyer në ish-Prokuror i Përgjithshëm i Britanisë, si Sir Keir Starmer, nëse do fitojnë një “supermaxhorancë”, me të madhe se ajo e Toni Bler në 1997-en do u konsiderohet një formë suksesi, me 484 vota krahasuar me 418 të fituara nga Toni Bler.
Sondazhet një ditë para zgjedhjeve treguan se konservatorët e drejtuar nga Rishi Sunak, një njeri që është më i pasur se Mbreti Charles, mund të marrin rreth 64 vende në parlament, ç’ka do jetë humbja më e madhe e tyre në dy shekujt e fundit, që nga vitin 1834. Ndërsa partia e Brexit, me emrin Reforma, mund të marrë shtatë vende.
Në të gdhirë të 5 korrikut, lajm nuk do jetë nëse Laburistët do fitojnë thellë, por nëse konservatoret do vazhdojnë të drejtojnë pas 14 vjetësh Britaninë, që as ata vetë nuk e besojnë, dhe po luftojnë më shumë, jo për shmangien e humbjes, por thellësisë së saj./TCh
