Pranë varrit të djalit të saj, qëndron e ulur e me lot në sy. Jo vetëm në këtë përvjetor, por Alltane Duraku tërë këto njëzet e shtatë vjet i ka kaluar me plot dhimbje dhe mall që nuk shuhet kurrë.

Djali i saj, Jetoni nga Krusha e Madhe u vra nga kriminelët serbë.

Në përvjetorin e masakrës së Krushës së Madhe, si edhe shumë nëna tjera, ajo shkoi për homazhe pranë varrit të djalit, i cili i kishte vetëm 17 vjet aso kohe.

Njëzet e shtatë vjet pas luftës, në Krushë të Madhe sot mbizotëroi loti dhe dhimbja për gjithë ato jetë të shuara.

Kujtimet për djalin e përcjellin kudo. Asnjëherë nuk do ta fal agresorin që shkaktoi tërë këto dhimbje mbi popullatën e pafajshme.

Me qindra familjarë e qytetarë kanë bërë homazhe sot në Kompleksin Memorial të Krushës së Madhe, ku prehën trupat e gjithë atyre që u vranë e masakruan.

Pothuajse të gjithë me lot në sy, e me lule për të nderuar martirët të rënë për liri.

Në mesin e tyre është edhe djali i vëllait të tetëdhjetë e dy vjeçarit, Shefki Hoti, i cili ka edhe rreth 20 familjarë të vrarë.

Krusha e Madhe ka përkujtuar sot të vrarët dhe të masakruarit nga forcat serbë.

Më 25,26 dhe 27 mars të vitit 1999 në Krushë të Rahovecit janë masakruar 243 persona. Në mesin e tyre edhe sot për 64 persona nuk dihet fati i tyre.

Në Krushë të Vogël sot është rivarrosur Ajvaz Shehu i cili 27 vjet më parë ishte zhdukur. Eshtrat e tij janë gjetur në Shirokë para tetë vitesh, por ai nuk arriti aso kohe të rivarroset për shkak se nëna e tij kurrsesi nuk ishte pajtur me faktin se këto eshtra përkojnë me trupin e djalit të saj.

/Kosovapress/