Policia e Kosovës ka dhënë detaje të dielën për shpërthimin e një bombole gazi në fshatin Kçiq të Mitrovicës, ku si pasojë mbetën të lënduar 14 persona.

Siç njofton policia, rasti ka ndodhur rreth orës 16:35, ku shkaqet e shpërthimit ende nuk dihen.

Sipas policisë, përveç të lënduarve si pasojë e shpërthimit janë shkaktuar edhe dëme të konsiderueshme materiale

“Kçiq i Madh, Mitrovicë Jugu / 13.01.2024 – 16:35. Katërmbëdhjetë persona kanë pësuar lëndime trupore si pasojë e shpërthimit të një bombole gazi në bodrumin e shtëpisë ku po qëndronin. Të lënduarit janë dërguar për trajtim mjekësor në QKUK. Shkaqet e shpërthimit ende nuk dihen. Përveç të lënduarve si pasojë e shpërthimit janë shkaktuar edhe dëme të konsiderueshme materiale. Në vendin e ngjarjes përves njësive të nevojshme policore kanë dalë edhe zjarrfikësit dhe eksperti i zjarrit. Rasti është duke u hetuar nga njësitet kompetente”, thuhet në raportin 24 orësh të policisë.

Pacientët pasi kishin marrë trajtimin fillestar në Spitalin e Përgjithshëm të Mitrovicës, janë sjellë në QKUK me djegie të shkallës së dytë dhe të tretë, në gjymtyrë të ndryshme të trupit, si fytyrë, duar dhe këmbë.

Kryeministri Albin Kurti, ka vizituar të lënduarit mbrëm në QKUK për të mësuar nga afër lidhur me gjendjen shëndetësore të personave që u lënduan dje në Kçiq të Mitrovicës nga shpërthimi i bombolës së gazit.