Numri i të vdekurve nga përmbytjet në Spanjë ka shkuar në 158, ku shumica dërmuese, 155, u regjistruan në Valencia, njoftoi Qendra rajonale e koordinimit të emergjencave në platformën X.

“Vazhdon procesi i mbledhjes dhe identifikimit të viktimave”, thuhet në deklaratë.

Më herët, agjencia shtetërore e lajmeve e Spanjës EFE raportoi se numri i të vdekurve ishte 140.

Ekziston ende mundësia që të gjenden viktima të tjera pasi një numër i panjohur njerëzish janë ende të zhdukur.

“Për fat të keq, ka njerëz të vdekur në disa automjete”, tha ministri spanjoll i Transportit Oscar Puente.

Autoritetet lokale kanë lëshuar paralajmërime për informacione të rreme që qarkullojnë në internet, duke përfshirë pretendimet për sigurinë e ujit të pijshëm  në Valencia

Ushtria është thirrur për të ndihmuar zonat e prekura nga përmbytjet në Valencia që nga mëngjesi i nesërm, sipas presidentit rajonal.

"Sapo kam kërkuar përfshirjen e ushtrisë dhe forcave tokësore, detare dhe ajrore të disponueshme për të rritur detyrat logjistike dhe shpërndarjen e ndihmës për popullatën," tha ai në një postim në X.

Më shumë se 1 mijë ushtarë nga njësitë e shpëtimit të urgjencës të Spanjës janë bashkuar tashmë me punonjësit e urgjencës rajonale dhe lokale në kërkimin e trupave dhe të mbijetuarve. Ministri i Mbrojtjes tha se vetëm ushtarët deri mbrëmë kanë nxjerrë 22 trupa dhe kanë shpëtuar 110 persona.

Ndeshja mes Valencias dhe Real Madridit është shtyrë siç pritej, ndërsa klubi fokuson përpjekjet e tij në lehtësimin e përmbytjeve. Ende nuk është përcaktuar një datë dhe orë e re. Ndërkaq, stadiumi “Mestalla” u bë vend për të ndihmuar viktimat.

Sasi rekord të reshjeve nuk u regjistruan vetëm në Spanjën kontinentale. Në fillim të javës, rekordet e tetorit u thyen në Ishujt Balearik, ku të hënën ranë 174 milimetra shi.

Pritet që 120 milimetra të tjera shiu mund të bien në ishuj në vetëm disa orë, duke bërë që Shërbimi Meteorologjik Spanjoll të lëshojë një paralajmërim portokalli për shi dhe stuhi në Mallorca dhe Menorca të premten dhe të shtunën.

Një zonë tjetër që mund të preket nga stuhi të forta, me një paralajmërim portokalli, është Spanja jugperëndimore, rreth Cadiz.