• Prof. dr. habil Bajram Berisha ligjërues i ftuar në Kongresin 2022 të Bioteknologjisë Evropiane

Në Kongresin 2022 të Bioteknologjisë Evropiane që i zhvilloi punimet në Pragë të Çekisë prej 5 deri më 7 tetor ishte i ftuar edhe shkencëtari ynë kosovar Profesori i Universitetit të Prishtinës “Hasan Prishtina” Prof. dr. habil Bajram Berisha.

Në Kongresin 2022 të Bioteknologjisë Evropiane që u organizua nga Shoqata Evropiane e Rrjetit Tematik të Bioteknologjisë (European Biotechnology Thematic Network Association), Profesori Berisha sikur edhe herëve të tjera ishte i ftuar për të dhënë një ligjëratë nga fusha e tij shkencore.

Ligjërata e Profesor Berishës e cila u dha në kuadër te seksionin të bioteknologjisë shtazore, këtë vit ishte e fokusuar në mekanizmat molekularë, përgjegjëse për rregullimin e funksionit të vezores. Sipas profesor Berishës, të kuptuarit sa më të mirë të mekanizmave molekularë të fiziologjisë së vezores paraqet faktorin vendimtar në përmirësimin e shëndetit riprodhues si dhe në shfrytëzimin sa më të mirë të potencialit të fertilitetit të specieve të ndryshme.

E cili është Profesor Berisha? Profesor Bajram Berisha ka studiuar në Universitetin e Prishtinës (UP), magjistraturën në Universitetin e Lubjanës, ndërkaq ka doktoruar dhe është habilituar në Universitetin Teknik të Munihut (TUM). Është profesor i universitar në TUM (Gjermani), në UP (Kosovë) dhe në Universitetin Bujqësor të Tiranës (Shqipëri).

Profesor Berisha ka realizuar dhjetëra projekte shkencore kombëtare dhe ndërkombëtare në Gjermani, në Kosove dhe në Shqipëri.

Profesor Berisha ka marrë pjesë aktive në qindra konferenca, kongrese dhe tubime të tjera shkencore, ndërkaq ka publikuar dhjetëra punime origjinale shkencore në revistat më të mira të fushave të tij shkencore (fiziologji, gjenetikë dhe bioteknologji animale).

Profesor Berisha në Kosovë ka kryer detyra me përgjegjësi në institucionet e arsimit të lartë dhe të shkencës, ndërkaq aktualisht është anëtar i Këshillit Kombëtarë te Shkencës.

Për arritjet e tija shkencore, Profesor Berisha është dekoruar nga institucione të ndryshme shkencore ndërkombëtare, ndërkaq së fundmi nga Universiteti Teknik i Munihut është zgjedhur “TUM Ambasador”, dhe nga Akademia e Shkencave të Shqipërisë anëtar i jashtëm i Akademisë së Shkencave të Shqipërisë.

Profesor Berisha aktualisht punon në Universitetin e Prishtinës, ndërkaq është i angazhuar në vazhdimësi në cilësinë e profesorit vizitor në Universitetin Teknik të Munihut në Gjermani.

Profesor Berisha po ashtu është njëri ndër shkencëtarët më kulmorë të Institutit Alb-Shkenca dhe promotori i përhapjes dhe përcjelljes së dijes shkencore të brezat e studiuesve në Kosovë, në Shqipëri e në Gjermani dhe gjithandej.