Shtetet e Bashkuara kanë njoftuar se do të ndërpresin gradualisht ndihmën shëndetësore për Zimbabven, pasi dështuan negociatat për një marrëveshje financimi prej 367 milionë dollarësh për pesë vjet, raporton Associated Press.

Qeveria e Zimbabves tha se refuzoi propozimin për shkak të kushteve që kërkonin qasje të plotë në të dhëna të ndjeshme shëndetësore, përfshirë mostra virale dhe informacione epidemiologjike. Sipas zëdhënësit Nick Mangwana, presidenti Emmerson Mnangagwa urdhëroi ndërprerjen e bisedimeve, pasi SHBA-ja nuk ofroi garanci për qasje të ndërsjellë në inovacione mjekësore si vaksina apo trajtime që mund të zhvilloheshin nga këto të dhëna.

SHBA-ja ka qenë donatori më i madh dypalësh në sektorin shëndetësor të Zimbabves, me rreth 2 miliardë dollarë ndihmë që nga viti 2006. Ndërprerja e fondeve ngre shqetësime për vazhdimësinë e trajtimit të rreth 1.2 milion personave që marrin terapi kundër HIV-it dhe për stabilitetin e sistemit të brishtë shëndetësor të vendit.