Peshkopi serb Teodosije Shibaliq sot ka marrë vendim që për shkak të situatës së sigurisë, ceremonia e manifestimit të “Vidovdanit”, e planifikuar për 28 qershor, të mos e mbahet tek monumenti që është afër Prishtinës, por në Manastirin e Graçanicës.

Teodosije u takua sot me komandantin e KFOR-it, gjeneral Angelo Michele Ristuccia, ku ka shprehur shqetësimet e tij për përkeqësimin e situatës së sigurisë në Kosovë.

Ai gjithashtu e informoi gjeneralin për planet për festimet e ardhshme të “Vidovdanit”.

Ndërkohë në njoftimin e peshkopit thuhet se besojnë se ky vendim është e vetmja zgjidhje e përgjegjshme në një situatë, ku ata dhe populli serb në tërësi, nuk kanë besim se sigurinë dhe kushtet normale për mbajtjen e përkujtimit në Gazimestan, mund t'i ofrojë Policia e Kosovës.

Po ashtu, theksohet se ata do të kërkojë mbrojtje shtesë nga KFOR-i gjatë festimeve të këtij viti.

Serbë të cilët vinë edhe nga Serbia në Kosovë më 28 qershor, festojnë Ditën e Shën Vidit, të njohur më shumë si “Vidovdan”. Kremtimi i kësaj dite ndërlidhet me përvjetorin e 634 të Betejës së Kosovës, që historia serbe e njeh si fitore, pavarësisht një humbjeje të madhe të forcave ballkanike dhe vrasjes së princit serb, Llazar.

Kremtimi i përvjetorit të Betejës së Kosovës në vitin 1989, në kohën e udhëheqjes së presidentit serb Sllobodan Millosheviq, u kthye në kulmin e nacionalizmit në ish-Jugosllavi, me shpalljen siç thuhej të bashkimit të Serbisë, përmes rrënimit të autonomisë së Kosovës dhe me paralajmërimin e luftërave të përgjakshme që çuan në shkatërrimin e ish federatës jugosllave.