Shoqata e Prokurorëve të Kosovës dënon kërcënimin ndaj prokurorit Ersan Qavolli pas sekuestrimit të më shumë se një ton marihuanë në Pejë, duke thënë se do të vazhdojë të mbështesë fuqishëm çdo prokuror që ndodhet përballë presioneve dhe kërcënimeve gjatë kryerjes së detyrës.

Në një reagim për media, Shoqata e Prokurorëve të Kosovës shpreh shqetësim të thellë dhe solidaritet të plotë me prokurorin Qavolli dhe të gjithë kolegët që përballen me sfida të tilla në ushtrimin e detyrave të tyre.

Prokurorët e Kosovës shprehen të përkushtuar për të zbatuar ligjin pa frikë nga kërcënimet, duke thënë se këto akte të papranueshme nuk do të cenojnë përkushtimin e tyre në luftën kundër krimit të organizuar dhe trafikimit të lëndëve narkotike.

“Ne si Shoqatë e Prokurorëve të Kosovës inkurajojmë hetuesit policorë së bashku me prokurorin e rastit që të ndërmarrin veprime të menjëhershme për të siguruar mbrojtjen e integritetit dhe sigurisë së prokurorit, si dhe për të ndjekur penalisht përgjegjësit e këtyre veprimeve të paligjshme”, thuhet në reagim.

Shoqata e Prokurorëve të Kosovës nuk ka dhënë më shumë detaje në lidhje me kërcënimet ndaj prokurorit Ersan Qavolli.