Ish-zëvendësministri i Drejtësisë nga Lëvizja Vetëvendosje, Blerim Sallahu, e ka vlerësuar jokushtetues dekretin e presidentes Vjosa Osmani për shpërndarje të Kuvendit pas moszgjedhjes së presidentit të enjten.

Madje ai ka thënë se Kuvendi duhet t’i zhvillojë punimet për zgjedhjen e presidentit përderisa Gjykata Kushtetuese të vendosë për kërkesën që është dërguar dhe që mund të dërgohen në të ardhmen për rastin konkret.

“Dekreti është qartazi kundërkushtetues. Andaj, nuk mund të shpallen zgjedhjet e parakohshme mbi një bazë kushtetuese inekzistente. Kriteret e nenit 86 dhe 82 par. 1.3 të Kushtetutës mbi të cilat është bazuar dekreti nuk janë përmbushur për ta dërguar vendin në zgjedhje. Konsideroj që Kuvendi duhet t’i zhvillojë punimet përderisa kemi dekret qartazi kundërkushtetues dhe përderisa Gjykata Kushtetuese të vendosë për kërkesën që është dërguar dhe që mund të dërgohet në të ardhmen për rastin konkret”, ka shkruar ai në rrjetin social “Facebook”.