Sekretari i Përgjithshëm i NATO-s, Mark Rutte, ka theksuar se Aleanca Veriatlantike po forcohet gjithnjë e më shumë falë lidershipit të Shteteve të Bashkuara dhe rritjes së angazhimit nga aleatët.

Në një fjalim të mbajtur në Institutin Ronald Reagan në Uashington, ai nënvizoi rolin historik të SHBA-së në NATO.

“Falë lidershipit amerikan dhe përkushtimit kolektiv për liri dhe siguri, NATO po bëhet më e fortë”, tha Rutte, njofton zyra e medieve e Aleancës, përcjellë KosovaPress.

Ai shtoi se ndryshimi i qasjes dhe rritja e investimeve në mbrojtje po krijojnë një partneritet të ri dhe më të fuqishëm në marrëdhëniet transatlantike teksa theksoi se është thelbësore që vendet anëtare të vazhdojnë të rrisin kontributin e tyre për një NATO më të fortë dhe më të drejtë.

Për këto tema, por edhe për çështje kyçe të sigurisë transatlantike, përfshirë zhvillimet që lidhen me Iranin, Rutte bisedoi gjatë vizitës së tij në Uashington, ku ma shkuar më 7 e do të qëndrojë deri më 12 prill, edhe me presidentin Donald Trump, sekretarin e shtetit Marco Rubio dhe atë të Mbrojtjes Pete Hegseth.