Instituti Kombëtar i Shëndetësisë Publike të Kosovës u ka bërë thirrje qytetarëve që të vaksinohen kundër gripit sezonal, pasi që javët e fundit është shënuar rritje e rasteve të raportuara.

“Kjo ka rezultuar edhe me rritje të fluksit të qytetarëve që po kërkojnë ndihmë mjekësore në institucionet shëndetësore”, tha të martën IKSHPK.

“Gripi sezonal është sëmundje akute infektive e cila te një numër i konsideruar i rasteve shkakton komplikime serioze shëndetësore, veçanërisht te fëmijët, të moshuarit dhe ata me sëmundje kronike, ndërsa vaksina kundër gripit është mënyra më e mirë për të reduktuar rrezikun e infektimit dhe përhapjen e virusit”, thuhet në njoftim.

Instituti ka bërë thirrje për vaksinim, në veçanti për punëtorët shëndetësorë, gratë shtatzëna, personat me sëmundje kronike e imunitet të dobët, ata mbi moshën 65-vjecare si dhe fëmijët deri në 5 vjeç të cilat kanë indikacione shëndetësore.