Rreziku nga mjetet e pashpërthyera, KFOR-i fillon fushatën sensibilizuese
Lexohet për: 1 min.
4 muaj më parë
Linku u kopjua
Misioni KFOR ka nisur një fushatë sensibilizuese për rreziqet që paraqesin municionet e pashpërthyera, përmes një ceremonie mbajtur sot në shkollën e mesme "Bedri Pejani" në Pejë.
Në ceremoninë e hapjes morën pjesë ambasadori i Italisë në Kosovë, Antonello De Riu, zëvendëskomandanti i KFOR-it, gjeneral brigade Federico Bernacca, komandanti i Komandës Rajonale të KFOR-it në Perëndim, kolonel Rocco Mundo, kryetari i Pejës, Gazmend Muhaxheri, komandanti i Policisë rajonale, kolonel Shaban Shala, si dhe përfaqësues të organizatave ndërkombëtare.
Gjatë ditës, ambasadori De Riu u takua me kontingjentin italian të Komandës Rajonale të KFOR-it Perëndim, në kampin Villaggio Italia, ku shprehu vlerësimin e tij për shërbimet e shkëlqyera dhe kontributin e tyre të çmuar në përpjekjet e misionit të NATO-s.
Ndryshe, KFOR-i vazhdon të zbatojë mandatin e tij për të kontribuar në një mjedis të sigurt dhe lirinë e lëvizjes për të gjithë qytetarët në Kosovë, në çdo kohë dhe në mënyrë të paanshme, si reaguesi i tretë i sigurisë, në koordinim të ngushtë me Policinë e Kosovës dhe EULEX-in.
