RLIOF 4: Edukimi i publikut të së ardhmes
Në mini performancën në HyperActive, të organizuar nga RLIOF, fëmijët përjetuan magjinë e orkestrës.
Kjo është bërë me qëllim që ta nxisin dashurinë e tyre për artin.
Artisti Rame Lahaj tha se i kanë mbledhur fëmijët për ta takuar orkestrën prej së afërmi.
“Dje i mblodhëm fëmijët për ta takuar orkestrën prej së afërmi, me mundësinë që të luajnë së bashku... Por qysh në minutat e para ndodhi mrekullia kur fëmijët mishërohen me muzikantët, luajnë së bashku, ulen përballë njëri-tjetrit dhe dëgjojnë interpretimin e tyre me shumë ëndje për më shumë se 1 orë. Prania e diasporës na sjell gjithmonë lot gëzimi por buzëqeshja nuk mungon kurrë nga lumturia që fëmijët tanë, pavarësisht se ku rriten, gjatë verës takohen dhe luajnë së bashku në tokën e stërgjyshërve”, ka shkruar Lahaj.
Ai tha se askund e askujt nuk i duhet më shumë edukim, emancipim, infrastrukturë për artin dhe kulturën, si metodë më e duhur për t'i trajtuar traumat e vuajtjet që na kanë shoqëruar gjatë historisë.
“Ëndrra ime për një sallë adekuate koncertale dhe teatro aktive në gjithë Kosovën, është edhe më e madhe sesa ëndrra që kanë këta fëmijë për jetën dhe të ardhmen... Shihemi në koncertet tjera të RLIOF 4!”, tha ai.
