Futbollistët e Real Madridit dhe Barcelonës u takuan sonte në finalen e Superkupës së Spanjës në stadiumin “Al-Awwal Park” në Riad.

Madrilenët, të cilët në finale erdhën pasi mposhtën Atletico Madridin, u treguan shumë më të mirë se Barcelona, e cila në gjysmëfinalen tjetër eliminoi skuadrën e Osasunës.

Ekipi i udhëhequr nga Carlo Ancelotti nisi për mrekulli takimin duke arritur te goli i parë qysh në minutën e shtatë përmes Vinicius Junior.

Pas vetëm tre minutash lojë, po i njëjti lojtar dyfishoi epërsinë për madrilenët.

Barcelona dukej se do të rikthehej në lojë pas disavantazhit të shpejtë të madrilenëve, duke shënuar përmes polakut Robert Lewandowski në minutën e 33-të. Por, kjo ishte e tëra që ata mundën të bëjnë.

Serish në skenë gjashtë minuta më vonë del Vinicius për het-trik – 3:1, gol ky i shënuar nga pika e bardhë.

Me rezultat 3:1 për Real Madridin përfunduan 45 minutat e para të ndeshjes.

Në pjesën e dytë nuk pamë një rikthim eventual të Barcelonës. Ekipi katalanas mbeti me një lojtar më pak në fushë në minutën e 71-të, pasi Ronald Araujo mori edhe kartonin e dytë të verdhë.

Skuadra madrilene gjeti edhe golin e katërt përmes Rodrygo në minutën e 64-të, pas të cilës çdo gjë u bë e qartë sa i përket fituesit të Superkupës.