Kryeministri i Shqipërisë, Edi Rama, deklaroi se pozicioni i vetëdobësuar diplomatik i Kosovës dhe sipas tij gabimet e Prishtinës zyrtare në procesin e dialogut po vështirësojnë përpjekjet e Shqipërisë. Ai përsëriti kërkesën e tij që KFOR-i të marrë në kontroll veriun, meqë sipas tij forcat ekzistuese të kontrollit të kufirit janë krejt të pamjaftueshme. Rama foli në seancën e Kuvendit të Shqipërisë ku po diskutohet për agresionin e 24 shtatorit në Banjskë të Zveçanit.

Kuvendi i Shqipërisë po mban interpelancë me kryeministrin Edi Rama, të ftuar nga deputeti demokrat Kreshnik Çollaku. Interpelanca është ftuar me arsyetimin “dhënien e informacioneve dhe shpjegimeve lidhur me qëndrimin zyrtar të Qeverisë së Republikës së Shqipërisë, hapat që parashikohen të ndërmerren dhe qëndrimet në raport me zhvillimet e pritshme në marrëdhëniet ndërshtetërore në Ballkan”.

Në këtë seancë, Rama teksa foli për agresionin e 24 shtatorit në Banjskë të Zveçanit, u shpreh se lajmi i vrasjes së policit Afrim Bunjaku ishte bombë që shpërtheu me forcën tronditëse.

Zhvillimet e mëtejme, siç tha Rama, kishin pamjen e materialit arkivor nga lufta e shpërbërjes së ish-Jugosllavisë.

Kryeministri shqiptar theksoi se për herë të parë Shqipëria nuk u linjëzua me deklaratën e Bashkimit Evropian.

Tutje, Rama tha se pozicioni i vetëdobësuar diplomatik i Kosovës në sytë e BE-së dhe ShBA-së e bëjnë të vështirë përpjekjen e Shqipërisë.

Kryeministri shqiptar, Edi Rama u shpreh se Kosova po rrezikon ta humbas shansin historik, siç e quajti ai, që i jep plani franko-gjerman.

Teksa përmendi edhe deklaratën e tij në samitin e NATO-s për kontrollin e veriut, ai shtoi se është sulmuar nga një “armatë e hedhur në veprim”.

Rama shtoi se KFOR-i do të vazhdojë të qëndrojë në Kosovë meqë “nuk ka ku të shkojë, deri kur dialogu të ketë garantuar paqen përfundimtare”.

Në këtë seancë parashihet edhe një mocion me debat dhe miratimi i projektrezolutës në mbështetje të Kosovës.

Debati pritet të zgjasë minimalisht 5 orë, ndërsa nga seanca e kaluar ka pasur përplasje të forta me opozitën që ka kritikuar mazhorancën për mënyrën se si e ka trajtuar “24 shtatorin”, ndërsa për partinë në pushtet opozita kërkon të bëjë politikë me Kosovën.

Lajmi i plotë është në sistemin me parapagim.