Në mbrëmjen e kësaj të shtune, shpërthime të shumta janë dëgjuar në qiellin mbi Doha, ndërsa përgjimet e sistemeve të mbrojtjes ajrore janë parë dhe dëgjuar qartë mbi kryeqytetin e Katarit.

Ndërkohë, sirenat e alarmit kanë rënë në Tel Aviv, teksa mediat izraelite raportojnë për sulme me raketa nga Irani. Channel 12 njofton për një shpërthim të fuqishëm në Izraelin qendror, ndërsa gazeta Israel Hayom raporton se një raketë ka rënë në Tel Aviv.

Sipas raportimeve nga terreni, gjatë gjithë ditës janë regjistruar shpërthime, por vala e fundit konsiderohet si më e zhurmshmja deri më tani. Korrespondentët raportojnë se midis 15 dhe 20 shpërthime të ndara janë dëgjuar në hapësirën ajrore mbi Doha. Sipas Al Jazeera, mbi një duzinë shpërthimesh janë regjistruar në kryeqytetin e Katarit, transmeton Euronews Albania.

Shpërthime dhe përgjime janë raportuar gjithashtu në minutat e fundit mbi baza amerikane në Bahrein, Kuvajt, Katar dhe Emiratet e Bashkuara Arabe.