Qytetarët të ndarë në dysh për situatën në veri: Kurti të bashkëpunojë me Amerikën
Lajme
Lexohet për: 2 min.
11 muaj më parë
Linku u kopjua
Qytetarët e Prishtinës janë ndarë në dysh sa i përket qasjes së kryeministrit Albin Kurti për situatën në veri të vendit. Derisa disa besojnë se kreu i ekzekutivit po vepron drejt, ka nga ata që thonë se bashkëpunimi me Amerikën është i domosdoshëm.
Ata që i përkasin grupit të dytë, besojnë se për shkak të moskoordinimit me partnerët ndërkombëtarë, Kosova po humbë përkrahjen nga Amerika dhe shtetet e tjera mike.
Se duhet koordinim me ndërkombëtarët thotë qytetari Mehdi Jashari.
Qytetari Shaip Hajrizi shprehet i bindur se për shkak të mungesës së bashkëpunimit të Kurtit me bashkësinë ndërkombëtare, Kosova është izoluar nga bota dhe nuk e gëzon përkrahjen që siç tha ai, e ka pasur më herët.
Megjithatë, për qytetarin Ismet Çitaku, vendimet e Kurtit janë të drejta. Ai konsideron se Qeveria Kurti po i largon kriminelët nga Kosova.
Ani pse thotë se për tema sikurse veriu nevojitet bahskëpunim me ndërkombëtarët, ai thekson se “në oborr të shtëpisë nuk ka të drejtë askush të përzihet”.
Edhe Izet Zhuja thotë se Kurti po vepron sipas ligjit dhe nuk duhet të sanksionet nga askush. Sipas tij, Kurti po mundohet t’i përmirësojë gabimet e të tjerëve.
Kujtojmë se lidhur me situatën në veri komuniteti ndërkombëtar i ka drejtuar tri kërkesa kryeministrit Kurti: Shtensionimin e situatës atje, mbajtjen e zgjedhjeve të reja dhe kthimin në dialogun për normalizimin e marrëdhënieve Kosovë-Serbi, të ndërmjetësuar nga Bashkimi Evropian.
Ndërsa ditë më parë, kreu i ekzekutivit, Albin Kurti, ka paraqitur pesë pika për situatën në veri, ku fokus sipas tij, duhet të jetë sundimi i ligjit në katër komunat veriore.
Situata në veri të Kosovës është tensionuar pas vendosjes së kryetarëve shqiptarë në zyrat e veta në objektet komunale, për çka serbët kanë protestuar. Si pasojë, grupet kriminale serbe kanë sulmuar Policinë e Kosovës, KFOR-in dhe mediat.
