Një ligj i ri është duke u hartuar nga Qeveria e Kosovës për mbrojtjen nga diskriminimi në përputhje me standardet për të drejtat e njeriut të Këshillit të Evropës, i cili do të trajtojë diskriminimin racor dhe antigjipzismin.

Kështu ka thënë kryeministri i vendit, Albin Kurti në Samitin e Ballkanit Perëndimor kundër diskriminimit racor “Mësimet e nxjerra, rekomandimet, dhe hapat e mëtutjeshëm në luftimin e diskriminimit racor – antigjipsizmit”.

Kurti ka shtuar se përmes ofrimit të shërbimeve sociale, familjet e tyre janë ndihmuar të aplikojnë për pjesëmarrje në pilotimin e skemës së re sociale.

E 17 përqind e individëve përfitues në skemë, janë nga komunitetet rom, ashkali dhe egjiptian.

Ndërsa, Ambasadori i Zvicrës ne Kosovë, Jurg Sprecher ka shtuar se në një hulumtim të fundit në Kosovë, ka dal se ende ka qëndrime diskriminuese ndaj komunitetit rom, ashkali dhe egjiptian.

E Shefi i zyrës së Terres Des Hommes në Kosovë, Pajtim Zeqiri ka vijuar se transformimi mund të bëhet i mundur vetëm nëse paragjykimet e stereotipat zëvendësohet me respekt e diverzitet.

Objektivat e Samitit përfshijnë forcimin e vullnetit politik për veprime transformuese për të adresuar racizmin sistemik dhe diskriminimin racor.