Punimi i profesorit të Fakultetit Juridik të Universitetit të Prishtinës Ardrit Gashi është vlerësuar si ndër më të mirët, duke u renditur në vendin e katërt në garën e organizuar nga Instituti Ndërkombëtar për Unifikimin e të Drejtës Private UNIDROIT, ka bërë të ditur Universiteti i Prishtinës.

Gara është organizuar në vigjilje të 30-vjetorit të Parimeve të UNIDROIT, të cilat janë një prej akteve juridike/instrumenteve më të rëndësishme të këtij instituti për kontratat komerciale ndërkombëtare.

Punimi në formë eseje i profesor Gashit analizon dhe jep ide për hapësirat/mundësitë e aplikimit të këtyre parimeve si e drejtë e “butë”, në juridiksione ku rregullat të drejtës ndërkombëtare private si e drejtë e “fortë” sfidojnë aplikimin e tyre, përkundër nivelit të avancuar juridik që kanë Parimet e UNIDROIT.

Në këtë drejtim dhe mbi të gjitha, punimi rekomandon aplikim të qasjeve më ndryshe se deri tani të UNIDROIT në përmbushjen e objektivave të tyre.  

UNIDROIT është një organizatë ndërqeveritare dhe e pavarur me seli në Romë, e cila studion nevojat dhe metodat për modernizim, harmonizim dhe koordinim të drejtës private ndërmjet shteteve dhe grupeve të shteteve, dhe në këtë mënyrë të nxjerrin akte juridike, instrumente ligjore, parime dhe rregulla uniforme dhe të përbashkëta për të gjitha shtetet https://www.unidroit.org/