Prokuroria deklarohet serish rreth intervistimit të Martin Berishajt
Prokuroria Speciale e Kosovës është deklaruar serish rreth intervistimit të ambasadorit Martin Berishaj, për të cilin thuhet se është i përfshirë në afera financiare. Në njoftimin e Prokurorisë thuhet se ambasadori i Kosovës në Kroaci është intervistuar sot me ftesë të Prokurorisë Speciale, me dyshimet për veprat penale shpëlarje e parave, shmangia nga tatimi dhe mos raportimi ose raportimi i rremë i pasurisë, të ardhurave, dhuratave, dobisë tjetër materiale ose detyrimeve financiare.
Tomë Gashi flet serish për intervistimin e Martin Berishajt në Prokurorinë Speciale • KosovaPress
“Ju njoftojmë se ambasadori Martin Berishaj, edhe më herët është ftuar për intervistim, por vetë Berisha kishte kërkuar nga Prokuroria Speciale që të shtyhet intervistimi, për shkak të angazhimit të tij si ambasador,” thuhet në njoftim. Gjatë ditës lidhur me rastin kanë folur edhe avokati Tomë Gashi dhe zëdhënësi i Prokurorisë Speciale Ekrem Lutfiu, por nuk kanë dhënë detaje me arsyetimin se deklarata e Berishajt është konfidenciale. Ndryshe, më herët ishte raportuar për një aferë financiare të ambasadorit Martin Berishaj në Slloveni. Berishaj shërben si ambasador i Kosovës në Kroaci që nga viti 2021. Ai ka shtetësi sllovene dhe para dekretimit si ambasador në Kroaci atij i është dhënë shtetësia e Kosovës nga presidentja Vjosa Osmani.