Profesori i ORL-së, Hesham Negm nga Universiteti i Kajros në Egjipt, ka vlerësuar zhvillimin e madh që ka përjetuar Kosova gjatë 25 viteve të fundit, si dhe rëndësinë e Kongresit të Shoqatës Ballkanike për shkëmbimin e përvojave profesionale mes specialistëve të fushës.

Negm tha se kishte vizituar Kosovën menjëherë pas pavarësisë dhe se ndryshimet e arritura ndër vite janë të dukshme.

“Kam ardhur këtu 25 vjet më parë, menjëherë pas pavarësisë. Dhe mund të them se vërehet një progres shumë i madh mes asaj kohe dhe tani. Kur erdha herën e parë dhe tani, ka një zhvillim shumë të madh dhe shumë të suksesshëm. Kjo është pika e parë. Pika e dytë ka të bëjë me këtë kongres. Ky është Kongresi i Shoqatës Ballkanike. Sigurisht, unë jam nga Egjipti, jashtë Ballkanit, por jam anëtar nderi i Shoqatës Ballkanike; ata më kanë zgjedhur si anëtar nderi dhe unë marrë pjesë gjithmonë në kongreset e saj”, tha ai.

Profesori egjiptian bëri të ditur se në kuadër të kongresit ka mbajtur dy ligjërata me tema shkencore.

“Kam dy ligjërata. Njëra ka të bëjë me përdorimin e endoskopisë së induktuar nga ilaçet për diagnostikimin e apnesë së gjumit. Tjetra është një temë historike me karakter shkencor, ku kam folur për Tutankhamunin, mbretin e famshëm egjiptian, koleksionin e tij, si dhe një studim që kemi bërë duke kompjuterizuar tomografinë e mumjes së tij për të gjetur disa të dhëna shkencore”, theksoi profesori egjiptian.

Specialisti i ORL-së theksoi se takime të tilla ndërkombëtare janë të rëndësishme për shkëmbimin e njohurive dhe përvojave mes profesionistëve nga vende të ndryshme.

“Sigurisht, kur mbledh njerëz nga vende të ndryshme, ne shkëmbejmë përvoja. Disa nga këtu, disa nga atje, dhe kjo e rrit përvojën e të gjithëve”, tha ai.

Kongresi i 14-të Ballkanik i Otorinolaringologjisë dhe Kirurgjisë së Kokës dhe Qafës (ORL dhe KKQ), një nga ngjarjet më të rëndësishme shkencore mjekësore në rajon, i cili po mbahet në Prishtinë nga 11 deri më 13 qershor.

Kongresi organizohet nga Shoqata e Otorinolaringologëve dhe Kirurgëve të Kokës dhe Qafës e Kosovës në bashkëpunim me partnerë vendorë dhe ndërkombëtarë.

/Kosovapress/