Albi Mall Superliga e Kosovës ka dhuruar verdikte dramatike dy xhiro para përfundimit të kampionatit, duke qartësuar fatin e kreut dhe të fundit të tabelës.

Skuadra e Prishtina e Re është konfirmuar zyrtarisht si ekipi i parë që largohet nga elita e futbollit kosovar. Fatit të njëjtë nuk ka arritur t'i ikë as Ferizaj, i cili pas rezultateve të sotme shndërrohet në skuadrën e dytë që përshëndetet zyrtarisht me Superligën për këtë edicion.

Në krahun tjetër të tabelës, gëzimi i ka takuar Malishevës së drejtuar nga Bylbyl Sokoli. Me një fitore fantastike dhe bindëse me rezultat 4:1 kundër Drenicës, Malisheva ka siguruar matematikisht pjesëmarrjen në garat evropiane për herë të parë në histori të klubit.

Kështu, Malisheva i bashkohet Dritës dhe FC Ballkanit si tri skuadrat e sigurta që do ta përfaqësojnë Kosovën në Evropë këtë vit, ndërsa udhëtuesi i katërt drejt skenës ndërkombëtare do të vendoset përmes finales së Kupës së Kosovës.

Me rënien e dy skuadrave të fundit, e gjithë vëmendja e dy xhirove të mbetura do të zhvendoset te gara e ethshme për t'i ikur pozitës së barazhit.

Pesë skuadra si Prishtina, Dukagjini, Gjilani, Llapi dhe Drenica mbeten ende në rrezik për ta gjetur veten në ndeshjen shtesë të mbetjes në ligë.

Ndërkohë, një lajm interesant vjen edhe nga nivelet më të ulëta, ku FC Mitrovica ka siguruar zyrtarisht inkuadrimin në Ligën e Parë, gjë që nënkupton se sezonin e ardhshëm ky rang garash do të ketë plot tri skuadra nga qyteti i Mitrovicës.

KosovaPress