Presidenti izraelit Isaac Herzog deklaroi sot se sulmi me raketa dhe dron i Iranit gjatë natës ndaj Izraelit ishte një shpallje lufte dhe se Tel Avivi po shqyrton të gjitha opsionet. “Secili prej nesh duhet të shikojë dhe të pyesë se çfarë do të bënim nëse do të sulmoheshim në një mënyrë kaq agresive siç na sulmuan mbrëmë”, tha Herzog në një intervistë për Sky News. I pyetur nëse mendon se Izraeli duhet t'i përgjigjet sulmeve duke u kundërpërgjigjur kundër Iranit, ai tha se ata "po shqyrtojnë të gjitha opsionet".

"Kjo është si një luftë e vërtetë...kjo është një shpallje lufte," tha Herzog, duke iu referuar sulmeve iraniane. Kabineti i luftës i Izraelit u takua sot pasdite për të diskutuar përgjigjet e mundshme ndaj sulmit me dron dhe raketa iraniane. Irani lëshoi një breshëri dronësh dhe raketash drejt Izraelit natën e kaluar në përgjigje të sulmit të 1 prillit në konsullatën e tij në Damask që vrau disa komandantë iranianë. IRGC thuhet se ka gjuajtur qindra dronë dhe raketa në një sulm që zgjati disa orë, shumë prej të cilave u kapën nga sistemet e mbrojtjes ajrore izraelite. SHBA, Britania e Madhe dhe Franca ndihmuan në rrëzimin e raketave. Herzog tha se ishte "i lumtur që janë pjesë e një koalicioni të jashtëzakonshëm kombesh që ka qenë pjesë përbërëse në parandalimin e shumicës së këtyre raketave, dronëve dhe armëve që të hyjnë në Izrael".