Presidenti i Irakut, Abdul Latif Rashid e ka uruar, të marten, Mojtaba Khamenein për përzgjedhjen e tij si udhëheqësi i ri suprem i Iranit.

Ky i fundit u shpall pasardhës i babait të tij, Ajatollah Ali Khamenei, i cili u vra në një sulm ajror të SHBA-së dhe Izraelit më 28 shkurt.

“Shpresojmë që periudha e ardhshme të shënojë fundin e luftës dhe t’i japë përparësi mençurisë dhe dialogut për të siguruar siguri, stabilitet dhe mirëqenie për popullin iranian,” tha Rashid në një deklaratë të publikuar nga zyra e tij, transmeton Anadollu Agency, përcjellë KosovaPress.

Ai gjithashtu theksoi mbështetjen e Irakut për të gjitha përpjekjet rajonale dhe globale për t’i dhënë fund konflikteve, për të ulur tensionet dhe për të punuar së bashku për sic tha, forcimin e sigurisë, stabilitetit dhe paqes.

Situata e sigurisë dhe ajo politike në rajon është përshkallëzuar ndjeshëm që kur Izraeli dhe SHBA-ja nisën një sulm të përbashkët ndaj Iranit më 28 shkurt.

Autoritetet në Teheran pretendojnë se ato shkaktuan vdekjen e më shumë se 1,200 persona dhe plagosjen e mbi 10,000 të tjerëve.

Jerusalemi ndërkaq, e ka pranuar se nga sulmet hakmarrëse të Iranit janë vrarë 13 izraelite, dy nga të cilët kishin edhe shtetësi uzbeke

Teherani është kundërpërgjigjur me sulme me dronë dhe raketa që kanë shënjestruar jo vetëm Izraelin, por edhe Jordaninë, Irakun dhe vendet e Gjirit ku ndodhen baza ushtarake të SHBA-së.

/Kosovapress/