Kosova do të shkojë në zgjedhje të reja nacionale, diku në qershor, më së voni, pasi Kuvendi i Republikës nuk arriti ta zgjedhë presidentin e ri brenda afatit kushtetues, që përfundoi në minutën e fundit të 28 prillit.

“Zgjedhjet do të shpallen në afatin kushtetues”, tha kryetarja e parlamentit, Albulena Haxhiu, kur i vuri “drynin” Kuvendit, 1 minut pasi ora kaloi datën 28 prill.

Pavarësisht disa tentativave dhe seancave të njëpasnjëshme, partitë politike nuk arritën të sigurojnë votat e nevojshme për zgjedhjen e kreut të shtetit. Vetëvendosje propozoi 4 kandidatë për këtë pozitë, dy herë nga dy, por nuk ia doli të sigurojë 80 vota gjithsej, të cilat mund t’i bënte vetëm me ndihmën e opozitës.

Vetëvendosje propozoi Glauk Konjufcën e Fatmire Kollçakun në përpjekjen e parë, ndërsa Feride Rushitin dhe Hatixhe Hoxhën në të dytën. Për to nuk u sigurua numri “magjik” prej 80 votave, pasi opozita refuzoi të jetë pjesë e këtyre përpjekjeve

LDK u përfshi në një mundësi të vogël për t’u bërë pjesë e një marrëveshje me VV-në, por kjo e fundit refuzoi ta pranojë opsionin e preferuar të Lidhjes Demokratike - Vjosa Osmanin për presidente të “përsëritur”.

PDK gjatë gijthë kohës refuzoi të bashkëpunojë me VV-në për çështjen e kryetarit, por në një periudhë më të hershme kishte kërkuar që ajo të propozojë dy kandidatë për president, në mënyrë që njëri nga ta të zgjedhet. Kjo nuk ishte pranuar nga Vetëvendosje.

Zgjedhjet e reja janë të tretat në 15 muajt e fundit për Kosovën.

/Kosovapress/