Policia e stacionit në Shtërpcë, veç aktiviteteve rutinë dhe atyre të planifikuara, bazuar në planin aktiv "Mbrojta e Pyjeve", pas disa informacioneve që ka siguruar, sot në fshatin Brod ka ndaluar një furgon që po transportonte drurë ilegalisht nga malet e Shtërpcës.

Me këtë rast policia ka konfiskuar mjetin për dokumentacion të parregullt, ndërsa ka njoftuar edhe zyrtarët e Drejtorisë për Administrimin e Parkut Kombëtar “Sharri”, të cilët kanë dalë në vendin e ngjarjes dhe kanë shqiptuar fletëparaqitje ndaj një personi për transport ilegal, ndërsa furgoni me drurë është konfiskuar.

Policia fton qytetarët për bashkëpunim, nëse kanë informacione rreth prerjes, transportit apo shitjes ilegale të drurëve, të njoftojnë menjëherë policinë, stacionin më të afërt, apo përmes aplikacionit digjital “Lajmëro policinë” dhe në numrat kujdestarë: 192,0290/326-250 & 0290/322-406, policia do të reagojë menjëherë dhe do të koordinojë aktivitetet me rojet e pyjeve. Të dhënat e juaja do të ruhen në konfidencialitet të plotë.