Policia e Kosovës ka konfirmuar se një person, për të cilin u raportua se të dielën i ishin shfaqur probleme shëndetësore gjatë një fluturimi nga Zvicra për në Prishtinë, ka vdekur rreth orës 17 e 15 minuta të kësaj dite, në Qendrën Klinike Universitare të Kosovës (QKUK).

Sipas raportit 24-orësh të forcave të rendit, rasti ka ndodhur të dielën në Aeroportin Ndërkombëtar të Prishtinës “Adem Jashari”.

“Lidhur me rastin, viktimës mashkull kosovar pasi i ishin shfaqur probleme shëndetësore i njëjti është dërguar në QKUK ku më pas ka ndërruar jetë”, thuhet në raport.

Vdekja e tij është konstatuar nga mjeku kompetent, ndërsa me urdhër të prokurorit trupi i pajetë është dërguar në Institutin e Mjekësisë Ligjore (IML) për obduksion.

Policia ka bërë me dije se ka iniciuar rastin si “Hetim mbi vdekjen” dhe po vazhdon procedurat e mëtejme hetimore për të sqaruar rrethanat e rastit.

Sipas raportimeve, ky rast i rrallë që ndodhi gjatë fluturimit, të dielën, kishte bërë që zbritja e udhëtarëve nga aeroplani, të shtyhet për një orë, për shkak të ndërhyrjes së ekipeve të emergjencës, me të ateruar të avionit në Prishtinë /Kosovapress/