Për shkak të temperaturave të larta dhe rrezikut të shtuar nga zjarret gjatë sezonit veror, Policia e Kosovës ka bërë thirrje për kujdes të shtuar nga të gjithë qytetarët, duke theksuar se zjarret mund të shkaktojnë pasoja të rënda për jetën, pronën dhe mjedisin.

Sipas një apeli të Policisë së Kosovës, qytetarët duhet të shmangin ndezjen e zjarreve në ambiente të hapura dhe të tregojnë kujdes të veçantë gjatë përdorimit të shkrepëseve, cigareve, grillave apo aktiviteteve të tjera që mund të shkaktojnë zjarr.

Policia ka kërkuar gjithashtu bashkëpunimin e qytetarëve për të raportuar menjëherë çdo rast të dyshuar të zjarrvënies apo personat që mund të jenë të përfshirë në veprime të tilla.

Autoritetet kanë paralajmëruar se do të ndërmarrin masa ligjore ndaj të gjithë personave që, me dashje ose nga pakujdesia, rrezikojnë sigurinë e qytetarëve dhe shkaktojnë dëme përmes zjarreve.

Policia u ka bërë apel banorëve të rajonit të Pejës që të jenë maksimalisht të kujdesshëm gjatë gjithë periudhës së verës, në mënyrë që të parandalohet përhapja e zjarreve dhe të mbrohet siguria publike.

/Kosovapress/