Plepolli: Prishtina po rikthehet, lojtarëve iu janë premtuar premio për të fituar ndaj Ballkanit
Lexohet për: 3 min.
2 vite më parë
Linku u kopjua
Sonte, në kuadër të xhiros së pestë të Superligës së Kosovës, në stadiumin “Fadil Vokrri” do të zhvillohet super derbi ndërmjet Prishtinës dhe kampionit në fuqi, Ballkanit.
Duke folur për këtë ballafaqim, trajneri dhe analisti Arsim Plepolli, ka thënë për KosovaPress se po na pret një luftë e pakompromis në fushë sepse të dy skuadrat do të synojnë të marrin tre pikë të plota nga ky ballafaqim.
“Sa i përket ndeshjes bëhet fjalë për dy ekipe që ndoshta për momentin me Dritën janë në formën më të mirë, por edhe me Gjilanin. Do të jetë një luftë pa kompromis sigurisht se Prishtina kërkon fitore dhe kërkon ndoshta pak në atë aspektin psikologjik është më e pushuar se Ballkani. Ballkani ka qenë më i ngarkuar duke marr parasysh fazën e kualifikimeve atëherë edhe loja e fundit me Shkupin, ndoshta, mos të ia lëmë krejt lodhjes se kanë pasur kohë edhe për rikuperim. Por shpresoj të jetë një ndeshje e mirë, të jetë një ndeshje e fortë sepse të dy ekipet kanë lojtarë kualitativ dhe unë jam i bindur që atmosfera brenda stadiumit do ta ngrisë edhe adrenalinën te futbollistët. Shpresojmë në një lojë derbi, në një lojë siç na ka hije.”, theksoi ai.
Ai po ashtu bëri të ditur se kryesia e Prishtinës iu ka ofruar premio lojtarëve në rast të fitores ndaj Ballkanit.
“Sigurisht se po, nëse Prishtina e fiton këtë ndeshje atëherë motivi është ndryshe sepse sa kam dëgjuar edhe kryesia e klubit janë duke iu qëndruar afër futbollistëve dhe kjo është shumë pozitive, e dimë Prishtinën para një viti si ka qenë. Kjo do të thotë shumë, nëse edhe fitojnë, se kam dëgjuar që edhe premiot do t’i kenë bukur të mira. Kjo është shenjë që Prishtina po rikthehet.”, shtoi ai.
Rikthimi i tifozëve në numër më të madh në ndeshjet e Superligës së Kosovës është një fakt që po e bënë të lumtur Plepollin. Ai tha se klubet kosovare e meritojnë këtë mbështetje.
“Më shumë mua po më gëzon fakti që është bërë ky mobilizim dhe po kthehen shikuesit se sa ndeshja sepse Kosovës i ka munguar publika, Kosovës i kanë munguar shikuesit. Siç po shihet, sot do të jetë stadiumi i stërmbushur, kjo për mendimin tim është pozitive sepse lojtarët e meritojnë pa marrë parasysh cila ekipë është, e meritojnë të jenë stadiumet e stërmbushura, siç po i shohim nëpër Evropë duhet t’i përkrahim dhe mua më së shumti për momentin më gëzon kjo.”, tha Plepolli në fund.
Ndryshe, në stadiumin “Fadil Vokrri” sonte pritet të jenë të pranishëm rreth 11 mijë tifozë.
