Ish-pjesëtari i Ushtrisë Çlirimtare të Kosovës, Pjetër Shala është dënuar nga Gjykata Speciale me 18 vjet burgim për krime lufte. Dhomat e Specializuara në Hagë e kanë shpallur fajtor Shalën për ndalim arbitrar, torturë dhe vrasje të paligjshme. Në vendimin e trupit gjykues për burgim prej 18 vitesh, do të llogaritet koha e kaluar në paraburgim.
Në aktgjykimin e shpallur të martën nga kryetarja e trupit gjykues, Mappie Veldt Foglia specifikohet dënimi për secilën pikë të akuzës.
Pjetër Shala ka provuar të flas, por nuk i është ndezur mikrofoni pasi gjykatësja ka theksuar se kjo seancë nuk është për deklarim të të akuzuarit. Më pas, seanca ka kaluar në transmetim me përmbajtje të redaktuar.
Ish-pjesëtari i Ushtrisë Çlirimtare të Kosovës u shpall fajtor për këto pika të aktakuzës: pika 1. ndalim arbitrar, pika 3. torturë, pika 4 vrasje e paligjshme.
Shala nuk është dënuar për akuzën e trajtimit mizor pasi gjykata ka vlerësuar se ajo është mbuluar nga akuza për torturë.
Zyra e Prokurorit të Specializuar ka kërkuar që dënimi të jetë prej 28 vitesh burgim.
Në këtë proces gjyqësor, ZPS-ja thirri 10 dëshmitarë për të dhënë dëshmi, ndërsa Mbrojtësi i Viktimave thirri dy dëshmitarë, dhe Mbrojtja 10 dëshmitarë.
Procesi gjyqësor kundër Shalës nisi më 21 shkurt 2023. Shala është deklaruar i pafajshëm për katër pikat e aktakuzës - ndalim arbitrar, trajtim mizor, torturë dhe vrasje të paligjshme.
Sipas aktakuzës, Pjetër Shala dhe disa ushtarë, policë dhe roje të UÇK-së në mes 17 majit 1999 dhe 5 qershorit 1999 “morën pjesë në ndalimin arbitrar, trajtimin mizor, torturën dhe në një rast në vrasjen e paligjshme të një të ndaluari në fabrikën e metalit në Kukës të Shqipërisë”.
Shala ishte arrestuar në mars 2021 në Belgjikë dhe ishte transferuar në paraburgim në Hagë, në prill të atij viti.
