Pas përurimit të sallës të edukatës fizike në shkollën “Abdurrahim Gërguri” në Dradhishtë të Obiliqit, u përurua edhe salla e edukatës fizike në shkollën “Ibrahim Rugova” në Mazgit të poshtëm të po kësaj komune.

Kryetari i Komunës, Xhafer Gashi, tha se ky projekt i ka kushtuar komunës 1 milionë e 100 mijë euro. Ai theksoi se Komuna e Obiliqit është në drejtim të plotësimit të infrastrukturës shkollore.

“Janë shumë të domosdoshme. Ne tani jemi në drejtim të plotësimit të infrastrukturës shkollore e në këtë rast me sallat e edukatës fizike në shkollat “Abdurrahman Gërguri” dhe “Ibrahim Rugova”.

“Projekti ka kushtuar rreth 1 milionë e 100 mijë euro, e tani nxënësit e këtyre lokaliteteve e kanë një mundësi më të madhe sepse edhe pjesën sportive e kanë të plotësuar”, u shpreh Gashi.

Gjithashtu ai pati një kërkesë për nxënësit e këtyre shkollave, duke thënë që ata t’i ruajnë që të mos dëmtohen sepse po krijohen me vështirësi.

“Prindërit e juaj janë ata që kanë besimin tek ne e ne po e kthejmë atë me punë. Kam vetëm një porosi ta ruajmë të gjithë së bashku që mos ta dëmtojmë sepse me vështirësi ne po e krijojmë” tha ai.